Ni Mer Layson | Pilipino Star Ngayon | August 19, 2014

MANILA, Philippines - Inamin ni Light Rail Transit Authority (LRTA) at Metro Rail Transit (MRT-3) spokesman Hernando Cabrera na napapanahon na ang pag-overhaul sa mga tren ng MRT-3.

Ayon kay Cabrera, base sa kanilang manual ay kailangang sumailalim sa overhaul ang mga tren kada ika-8 taon.

Taong 2006 pa nang unang isailalim sa rehabilitasyon ang mga tren kaya’t ngayong 2014 na ang ikawalong taon para sa overhaul.

“Last time na nag-rehabilitate tayo ay taong 2006 pa. Talagang napa­panahon na para mai-overhaul ito (mga tren), base dun sa kanilang ma­nual, dapat every eight years e ma-overhaul ito. So ito na yung tamang panahon,” ani Cabrera.

Kaugnay nito, iniha­yag rin ni Cabrera na mag­tatalaga na sila ng isa pang tagapagsalita na mula sa maintenance ng MRT-3 para siyang magpaliwanag hinggil sa mga aspetong teknikal ng tren.

Samantala, nakatak­dang ilabas ngayong­ araw ng Department of Transportation and Com­munications (DOTC) ang resulta ng imbestigasyong isinagawa hinggil sa pagkadiskaril ng isang tren ng Metro Rail Transit (MRT-3) sa Taft Avenue Station nito sa Pasay City noong naka­raang linggo, na nag­re­sulta sa pagkasugat ng halos 40-katao.

Ang resulta ng imbes­tigasyon ay iaanunsyo ni DOTC Secretary Joseph Emilio Abaya.

Una nang napaulat na posibleng human error­ o technical malfunction umano ang dahilan nang pagkadiskaril ng tren ngu­nit nilinaw ni Abaya na wala pang resulta ang imbestigasyon.

Kabilang sa mga si­nuri ng komite ang blackbox-like device ng tren at CCTV recordings mula sa istasyon.

Kinuha rin ang mga testimonya ng dalawang operator ng nadiskaril na tren, gayundin ng mga pasahero at mga bystan­ders na nakasaksi sa aksidente.